Skitouren von Mittamore

Saison 2025/26

Anzahl Skitouren gesamt: 20

Summe aller Höhenmeter: 15.515

Mittlere hm pro Tour: 776

Glatthornbahn

23 Nov 2025

Faschina - Bregenzerwaldgebirge

Samy

540hm

1h 20min

Guada Buiver, aber wenig Unterlag. Hod grod greicht ab Faschinajoch

Sonnig, dann a weng zuazong

Erste Skitour diese Saison, bzw. eig Splitboardtour - evtl hod jemand übern Sommer vergessen, dass de BOA vom Skitourenschuah hi is :D Naja ... Parkt bei Kiki's Wohnung und direkt vo dort losgeh kinna, ein Traum. Lifte ham no zua ghabt und mir warn a weng fertig, aiso aufe zur Glatthornbahn. Oben echt schena Buiver und no ned komplett zerfahn. Ois richtig gmacht :)

Hochälpele

07 Dec 2025

Bödele - Bregenzerwaldgebirge

Samy

370hm

45min

ned direkt vui, aber besser als erwartet.

Bewölkt, leichter Nieselregen

Ja man hod hoid wos gmacht ge, aber der guade Schnee vom Wochenende davor (wo ma in Barcelona warn) war natürlich scho wieder größtenteils weg. Trotzdem besser als erwartet ganga.

Westfalenhaus

21 Dec 2025

Lüsens - Sellrain

Leo, Samy, Stef

400hm

2h

wenig dafür bicklhirt

klar

Woidn moi wieder aufs Westfalenhaus, nachdem ma beim letzten moi ja leider koan Bloz ghabt ham. Samy in Innsbruck am Bahnhof obghoid und eine nach Lüsens. Dies moi muas aber bassn: schlechte Bedingungen, Sonntag auf Montag, wos soi do fein? Über d Loipe is guad ganga, durch de Woidschneisn a rechte Greierei. Dann wo ma d Hüttn scho gseng ham, vor uns de Katastrophe: a 5er Gruppn. Ja haggozack des derf ned wasai! A zeidl diskutiert und dann umdraht und wieder im Alpengasthof Praxmar übernacht. Hauptsach draußen gwen, aber da gehma nimma her :D

Lampsenspitze

22 Dec 2025

Praxmar - Sellrain

Leo, Samy, Stef

1200hm

3h 15min

überraschend guad für den wenigen Schnee! Oben sogar aufbauend umgwandelter Buiver.

bewölkt aber lässige Stimmung

Wirt hod gmoand er dad Lampsenspitze geh, aiso samma hoid wieder a d Lampsenspitze aufe! Übernachtung im Lager vom Alpengasthof Praxmar 45€, de 20€ Frühstück hamma liaba in 5 Weißbier investiert - win win. Aufstieg über Rodelbahn war subba, oben dann mit Harschis a guad ganga. Abfahrt war wirklich sehr guad für de Bedingungen, bis etwa 2500m hoda ma richtig guad fahn kinna, sogar mit Buiver. Ingesamt hod sis aiso scho wieder rentiert, a wenn da Stef scho einige Überzeugungsarbeit leisten hod miassn :D beim Hoamfahn hod d Samy dann sogar no neie Ski kauft beim IKO in Raubling!

Rotondo Skisafari

30 Dec - 03 Jan 2026

Realp - Uri

Leo, Samy, Stef

Zustieg Rotondohütte

1070hm

3h 45min

Unten vor allem südseitig wenig, aber gnua um kurz hinterm Parkplatz loszumgeh

sonnig

Mia san wieder moi auf Skisafari! Nachdem lang ned klar war, wos ma überhaupt machan, hamma uns am 28. dann entschieden, Silvester auf da Rotondohüttn zum vabringa. Stef hod an Insta Post gseng, wos ghoassn hod, dass ma scho wos macha konn - und wia! Zunächst war aber s Parken in Realp relativ deia, 76€ für 5 dog und 4 Nächste, des kannt ma besser planen z.B. davor iwo parken und dann mim Zug nach Realp - naja vlt beim nächsten moi. Zustieg zur Rotondo war mit 10km relativ lang, aber sehr guad machbar und sau sche. Hüttn is a a Traum, guads Essen und a Weißbier für 8 Fränklis griagd.

Pizzo Lucendro

1120hm

Gipfel: 2h 50min, Rundtour gesamt: 5h 45min

zwischen windpresst und buivrig

Koa Woikn

Auf zum Pizzo Lucendro! Erst moi schene Abfahrt mit Nasenbluten ins Loch, dann Aufstieg in die Scharte mit a boa andere und hinten rum zum Skidepot. De letzten Meter z Fuaß zum Gipfe, dann mit de Ski den steilen Hang obe, inkl Leos Ski-Sprung-Pfurz! Wunderbare Abfahrt, fast immer no mit na neia Spur in Buiver. Ursprüngliche Idee zum Hüenersattel rüberzuqueren hod ned funktioniert, deswegen abm Loch aufe Richtung Witenwasserengletscher. De andern san dann no aufe, Samy und i zruck Richtung Hüttn - a sau schene Rundtour! Um 5e hods dann Aperó vo de Wirtsleid gem mit gratis Glühwein und Snacks, a absoluter Traum. Nach ca. 6 Weißbier pro Person und 2,5L Wein de ma aufadrong ham, war's dann endlich soweit: 2026! Außer uns warn nur no de 3er Gruppn neben uns und de lustigen Schweizer auf, a brutal lustiger Abend :D

Übergang Capanna Piansecco

700hm

Witenwasserenpass: 1h, Passo di Rotondo: 1h 30min

Aufstieg zum Rotondopass spuren miassn, teilweise Pulver, teilweise windpresst, Südseite ins Bedrettotal runter war dann unten raus sau wenig, ca 30min tragenn durch Stoana bis zur Hüttn.

Kaiser

A guads Neis! Zwischen Übelkeit und Kopfschmerzen des Todes direkt um 8e los Richtung Capanna Piansecco - de Zigarettn hädn vlt doch ned alle sei miassn, aber Ibu 600er regeln das. Erste Abfahrt war tatsächlich richtig sche und nachdem as Kopfweh nachlassn hod, war i dann a iwann aufm Rotondopass drom. Südseitig is dann irgendwann gar gwen und mia ham über felsiges Blockgelände de Ski de letzte hoibe Stund zur Hüttn drong. De war sau sche, modern und mit gratis Dusche, a ned schlecht. Nur as Essen war uns für a Kodadog zgsund :D

Übergang Capanna Corno Gries und Griesgletscher

1600hm

Corno Gries: 2h 30min, Griesgletscher: 3h 20min, Zruck: 1h 45min

meistens windpresst, teilweise buivrig

am Anfang guad dann immer schlechter

Langer Tag heid: des hoast erst moi 2,5h zur Capanna Corno Gries - schaut bissl aus wie a Ufo, is aber richtig gmiadlich und hod a geile Kaffeemaschin (Tessin natürlich). Am Anfang wars richtig sche, geile Stimmung und cooler Weg rüber zur Hüttn. Dann fangt laut Stef a "normale Tour" o, dh nomoi guad 1100hm und 10km hintre zum Gletscher außer 1 anderer koa Mensch geht :D Laut Wirtin is de Querung am Stausee heikel - und des wars a. 3 Wege, der mittlere geht ned weil zu eiblosn, den untern hod der andere vorher grod gmacht, aiso hamma den gewählt, aber sche wars ned. Retrospektiv wärs obenrum am sichersten gwen, aber woas mas Goasmaß. Naja, hinten wars dann zwar scho sau cool mit dem Gletscher, aber der Koda und de km steckan oam dann scho in de Knochan. Um hoibe 3 umdraht und dann nomoi de greislige Querung gmacht, bis ma nach guad 24km und 8,5h endlich wieder am Ufo warn. Des sau guade Essn hods dann wieder aussa grissn!

Abfahrt Ulrichen

460hm

Richtung Griesscharte: 1h 30min, bis kurz hinter de Windradl: 45min, bis Ulrichen: 1h 45min

doch guad wos hergschnim über Nacht, teilweise gscheid verblosn, Hang Richtung Griesscharte extrem geil

durchgehend schlechte Sicht und Nebel, bis ma unten ausse kema san, dann nur no Schnee

Letzter Dog unserer Skisafari. Nachdems in da Nacht doch 10-20cm gschnim hod, hamma no den Hang Richtung Griesscharte mitgnumma (solang ma hoid wos gseng hod) und de Abfahrt war de beste vom ganzen Trip! Mega Buiver! Dann mühsam Richtung Windradl gsuacht mit GPS, de Straß war brutal eiblosn, deswegn directissima und dann Einstieg in den Hang ins Tal gsuacht. Da hods ghuifa, dass kurz aufzong hod und ma gseng hod dass scho geht. Ohne Sicht is des scho einfach grob. Dann nomoi subba Buiverhang mitgnumma und über de Passstraß nach Ulrichen ausgefahn/gschom. Leider hods d Samy no auf da Eisplattn glegt und an Daumen a weng gstaucht. Dafür hamma beim Warten aufn Zug no an guadn Croque-Monsieur griagd - herrlicher Abschluss von so am schena Ausflug!

Lank

04 Jan 2026

Rikatschwende - Bregenzerwaldgebirge

Martin, Samy

520hm

1h 20min

ca. 10cm Neuschnee, glangt genau

guad

Wenns scho moi an schena Neischnee hod, muas ma natürlich no gschwind überd Langwies aufn Lank aufe. Bei da Dornbirner Hüttn no Vanessa Michi Luis und co droffa, sche wars und relativ guad ganga is!

Frümseltal

05 Jan 2026

Horb Alt Sankt-Johann - Toggenburgerland

aloa

1180hm

2h 35min

nach Neuschneekarte ausgsuacht - unten gnuag zum losgeh aber ned soo geil zum obefahn (auf da Wiesn is scho ganga). Im Woid zwenig, desweng Abfahrt über Piste von Sellamat. Oben guad ganga aber insgesamt no zu wenig für richtig geil.

aufm Weg nach Alt Sankt-Johann ausm Nebe kema, herrlich sonnig!

Guade Entscheidung den Brückendog no zum nehma - a Traum Tagerl quasi aloa in de Schweizer Berg überm Walensee. Laut Beschreibung muas ma auf Karsthöhlen aufbassn, desweng relativ nach am Brisi hoitn beim aufegeh und obefahn. Ausblick oben is a Traum, unten da komplette Nebe drin. Bei da Abfahrt dann 2 alte droffa, de ham gsogt besser über de Loipe nach Sellamatt fahn (geht super) und dann unten wieder ume queren - wunderbar funktioniert. Parken hobi direkt in Horb derfa, nette Leid und nix los. Super Tour! Brotzeit beim Moosbrugger Käslon in Altach beim Kreisl ghoid: "mia san koa Jausenstation, gö!" :D

Isisizer Rosswis

06 Jan 2026

Berghaus Malbun (Buchserberg)

Samy

1220hm

2h 45min

unten dürftig aber grod so abfahrbar über "Piste", vui wichtiger is de Straße, sonst hätt ma durchn Woid drong miassn. Bis zum Isisizgrat durchwachsen, dafür hinten a absoluter Pulvertraum! Der Gegenanstieg lohnt sich!

anfangs super sonnig, dann immer mehr zuazong

Feiertag guad gnutzt und 7. Skitour in 7 Tagen gmacht :D heid a Stückerl vor der Tour vo gestern, beim Buchserberg. Parken 6 Fränklis, geht voi und dafür gibts a super teerte Straß de relativ weit aufe geht und bei drüftiger Schneelage guad zum obafahn is. Es brauchad trotzdem dringend no an hoibn Meter, dann wär ois geiler. Der heikle Südhang vom Isisizgrat runter (laut Skitourenguru) war null problem weil fast koa Schnee, sonst eher rechts hoidn so wie unser Rückaufstiegsweg. Der eigentliche Gipfel hinten is a Traum, komplett Pulver und wenig verspurt. Ham dann no des Hangerl neba da Rosswis mitgnumma und san vo oben gseng komplett links abfahn - wunderbar! Leider hod si d Samy d Schuida a weng broid, weils an deppadn Schneehügel überseng hod bei der blädn Sicht. Insgesamt aber a sau schene Gegend!

Lank

11 Jan 2026

Rickatschwende - Bregenzerwaldgebirge

Michi, Samy, Vanessa

780hm

Lank 1h, Fohramoos: 30min

20cm Neuschnee auf bissl Unterlag - super

Meist sonnig, a boa Woikn

Nach guadm Brunch doch koa Kinderbetreuung, also Samy mit Luis zum Rodln aufs Bödele, Michi Vanessa und I d Langwies aufe, frischen Buiver ausnutzen. Danach mit da Samy nomoi bis zum Woid. Wirklich super ganga und hod Spaß gmacht :)

Glatthorn

18 Jan 2026

Faschina - Bregenzerwaldgebirge

Kiki

510hm

1h 30min

Piste super, dann Regenharschdeckel, ganz oben windpresst, insgesamt aber ganz ok zum fahn.

Sonnig

Kurze schene Tour aufn Glatthornsattel mit da Kiki vo erna Wohnung aus. Kurzes Durcheinander weil Autoschlüssel nimma gfundn, aber de ham zum Glück gnuag Equipment, sodass ma dann doch starten ham kinna :D De Regenkruste hod schlimmes vermuten lassen, aber dadurch dass scho stark verspurt war, is der Teil a ganz guad machabar gwen. Danach no Kässpätzlegriagd vo da Monika und a bissl Lego gspuid mit Lio und Noe, schena Ausflug (nur schod dass d Samy ned kinna hod weils krank war).

Wöstersattel

25 Jan 2026

Lech am Arlberg

Aline, Samy

700hm

2h 45min

gnuag, teilweise aufbauend umgwandlt, teilweise harschig, ganz bissl buivriger Triebschnee

bewölkt und leicht gschneiblt hods

Aline's erste Gelände-Skitour! Nach 2 erfolgreichen Einstiegstouren im Spitzing nun das erste Wagniss ins freie Skigelände - Ski und Schuah hamma beim intersport in Lech ausgliehn (stolze 90€ aber wos mogsd macha) und dann is a scho losganga. Natürlich feinste Tourenplanung am Vorabend und mit Übungseinheiten vor Ort: Gelände lesen, Spitzkehren, Pausen, Wetter... Aufe samma guad kema, a wenn de 1,70m Ski sehr lang warn und de Spitzkehren dementsprechend zacher. Nachdems oben nur no neblig war, hammas am Wöstersattel guad sei lassn, obe hamma ja a no miassn. A weng anstrengend wars scho nach langer Zeit ohne Tiefschneeabfahrt, desweng hamma uns gfreid, als ma auf da noch geschlossenen Skipiste warn. Rundum aber ein toller Ausflug und jetzt wern neie Ski kauft! Und d Emmi hod si a recht gfreit, als ma nach 7h wieder do warn :)

Lank

30 Jan 2026

Rickatschwende - Bregenzerwaldgebirge

aloa

520hm

49min

5-10cm Neuschnee auf brauchbarer Unterlage

sonnig

Nach Schneefall von letzter Nacht in da Friah schnoi ausgnutzt und gschwind d Langwies aufe. Mim Bus gfahn weil da Martin s Auto braucht hod, aber einwandfrei ganga. Gesamtzeit vo Bushalte zu Bushalte 1h 6min und vo Haustür zu Haustür 2h.

Hochälpele

31 Jan 2026

Rickatschwende - Bregenzerwaldgebirge

Samy, Sophi

615hm

1h 55min

scho gscheid zerfahn, aber immer no guad. Langwies pistenartig

Sonne, iwann unten Nebel

Ah shit, here we go again... wieder Langwies aufe, dafür diesmoi mim Auto und weida bis aufs Hochälpele, mia san nämlich auf na Mission: schaun wie's Essen auf da Hochälpelehüttn schmeckt. Insgesamt gar ned schlecht, Schnitzi war fein, Suppn guad, Weißbier a Traum. Sophi's erste Skitour de Saison, subba Start :)

Hochälpele

01 Feb 2026

Schwarzenberg Haldenlift - Bregenzerwaldgebirge

Francis, Samy, Sophi

650hm

2h 30min

eig relativ vui Schnee, Piste super, abseits unten südlicher scho a wengal babbig, sonst echt no guad

anfangs bewölkt dann sonnig

Francis erste Tour heia! Dieses moi aufs Hochälpele von da andern Seitn - richtig lässiger Weg, ganz wos anders. Man hoid si unten scho relativ weit links und geht über Hüttevorsäß zum Winterwanderweg der zur Lustenauer Hüttn rüber geht. Dann koma links außen rum zum Gipfel. Hüttn hod leider nix mehr zum Essen ghabt, was ned wenig leid enttäuscht hod, Linzer Schnitte war dafür guad. Unten no an kurzen Einkehrschwung im Pilz - subba Abschluss für a schena Ausflug!

Hochälpele

17 Feb 2026

Schwarzenberg Heuboden - Bregenzerwaldgebirge

aloa

550hm

55min

unten babbig, oben guad, scho sehr zerfahn

bewölkt, leicht gschneiblt

Faschingsdienstagnamedog frei in Austria - juha! Beim ganzen Baustoinstress schnoi aufi aufn Berg und oba mit de Ski, oida des is sche! Tatsächlich diesmoi "richtig" überd Weltcuppiste aufeganga und a wieder obagfahn. Bus hi und retour is subba ganga!

Portlahorn & Damülser Horn

15 Mar 2026

Damüls - Bregenzerwaldgebirge

Paps, Samy

810hm

Portlahorn 1h, kurz unter Damülser Horn 45min

10-15cm Neuschnee auf Harschdeckl

Gemischt bewölkt, moi mehr moi weniger Sicht

Sonntag is Pausedog von unserer krassn Baustellnwoche! Über Nacht hods doch a weng wos hergschnim, aber durch de warmen Temperaturen von de Wochen davor hods scho relativ vui weggschmoizn. Desweng hoch aufe nach Damüls, dort hods no a Unterlag. Portlahorn is ganz guad ganga, Abfahrt rechts ghoidn nachm Loch und unten dann wieder auf d Aufstiegsspur kema. Dann bei da Straß direkt obe ins Loch, umbaun und aufe Richtung Damülser Horn (wie da Martin früher). Bis kurz vor des ganz steile Stück bei de Felsen ganga und nomoi a herrliche Abfahrt ins Loch genossen. Der kurze Gegenanstieg zur Straß is nur 15min und duad ned weh. Abgerundet durch Besuch bei da Kiki, richtig cooler Pausedog!