Skitouren von Mittamore

Saison 2024/25

Östlicher Kromerspitz

19 APR 2025

Vermuntstausee - Silvretta
Samy
1120hm
2h 50min
Oben super Firn, unten a bissl schwa.
Vormittags super Sonne, namedogs a bissl woikig.
Perfekter Skitourensaison-Abschluss auf da Silvretta und a ganz bsonderner Dog für uns zwoa. Kurzerhand des Wochenende genutzt und an Verlobungsring als Osterei im Rucksack versteckt. Am Gipfe wars zu windig, aber kurz vor da Seelücke hamma a wunderschens Platzal gfundn. Es hod einfach ois gstimmt und zur Feier des Tages hamma no Silberpfeile obeghaut und unser Verlobung mit am Kuacha und am Spritzer auf der Saarbrücker Hüttn gekrönt - besser konn's ned laufa ❤︎

Franz-Senn-Hütte

11 - 13 APR 2025

Seduck - Stubaital
Klaus, Paps, Rudi, Samy

Zustieg

720hm
2h 40min
Ab Oberissalm teilweise Schnee, richtig ganga is erst ab da Alpein Alm.
Sau warm und sonnig
Zustieg war eher madig, 2h hamma de Ski bestimmt drong ^^ ab Oberissalm immer wieder auf und abgfellt, im Schatten da Schnee zu tief zum zu Fuß gehn, in da Sonn gar nix mehr. Aber entlohnt worn mit na guadn Lasagne.

Ruderhofspitze

1320hm
4h 15min
Vui gnua Schnee hods ghabt, guada Stapfschnee am Grat, schena Firn zum Abfahn.
Kaiserweda
Ideal ausganga is si des. Nachdem da Kili de Woch vorher do war, hamma gwusst, dass ma whrs koa Gletscherausrüstung brauchan - genau so wars, ois richtig gmacht. Wunderschene Tour mit netter Gratgraxelei, mit knapp 18km insgesamt relativ lang aber trotzdem um kurz vor 3 auf da Hüttn gwen - gnua Zeit für a boa Weißbier mit unsere netten Kollegen aus St. Martin bei Hüttau. Subba Gulasch mit unglaublich guada Polenta!

Abstieg über Gschwezgrat

400hm
1h 20min
Gfroan, harschig und suizig
In da Nacht koid, am morgen bewölkt
Tour samma wegam schlecht ogsogtn Weda nimma ganga, aber dafür no übern Gschwezgrat aufe und hinten zur Oberissalm abgfahn. Des warad eig a schene Alternative, damit ma ned den blädn Weg z Fuaß obe muas, aber leider wars a ned bsonders guad zum fahn, weil ois gfrorn war bzw unten harschig und suizig. Mit Fixseil gehts leicht aufe de Schartn, is an sich a cooler Abstiegsweg.

Dortmunder Hütte

28 - 30 MAR 2025

Kühtai - Silz
Laura, Leo, Samy, Sofia, Stef, Tom

Wechnerscharte

980hm
4h
In da Nacht vo Freitag auf Samstag scho sau vui gschnim, Tagsüber einfach durchgschnim.
Zwischen Whiteout und Schnee
Erstes moi im Kühtai und auf da Dortmunder Hüttn. Mim auto direkt zum Parkplatz, hod eher Hotel als Hütten Feeling, aber sau nette Kellner und subba Essen. Nach na schneereichen Nacht zu Fuß von da Hüttn am Speicher Längental vorbei ins Mittertal eine. Unten no bessere Sicht, oben wars scho gscheid zuazong, sodass ma bissl an Umweg ganga san. Ned weida schlimm, aber hod doch 4h dauert bis zur Scharte. Oben is da Stef dann no auf da andern Seitn Richtung Längental obegfahn und wie a narrischer wieder auffa gstapft :D knappe 2h obe braucht, aber oben an Traum Buiver ghabt. Unten eher bescheidene Sicht - da Stef is trotzdem no auf d vordere Karlesspitze aufe grennt. Schena Einstieg, aber hodma si a erst verdiena miassn. Leo und Sophia san am Abend dazua kema, gmiadlich no 4 Bierle drunga, Zimmer warn für 2-3 Leid und sau gmiadlich!

Wetterkreuzkogel und Großes Windegg

1220hm
4h
Unten scho schwara, oben nordseitig unglaublicher Buiver!
Super Sonne Kaiser pur
So wie mas erhofft ham - nach 24h Schneefall die ersehnte Sonne. Und dann glei a so, brutales Kaiserweda mit dem besten Buiver om, des konsd da ned ausdenga. Erst moi aufe zum Wetterkreuzkogel mit a boa andere, dann aber den Grat weida zum Großen Windegg. A bissl a steile Abfahrt direkt vom Gipfe auf so a Band gnumma. Beim Stef is als erster glei a bissl wos mitkema, Lockerschneelawine de dann bis obe glaffa is, aber nix basiert. Für uns andern wars dann aber nimma so spaßig, weil drunter scho vui Stoana warn. Unten auße dann aber 500hm unverspurter Buiver Traum. Sofort aufd Uhr gschaut - geht si no aus, glei nomoi aufe! Stef hamma dann am Bahnhof aufm Weg ausalassn, ab nach Lausanne und dann nach Harvard.

Lindauer Hütte

14 - 16 MAR 2025

Latschau - Montafon
Laura, Leo, Samy, Sofia, Striez, Vanessa

Zustieg

750hm
2h 10min
Neuschnee aber relativ nass
Nachtzustieg, leichter Schneefall
Leider hod da Luis kurz vor Abfahrt gestreikt und woid ned bei seinem Cousin übernachten - Michi out. Mit de Münchner fast zeitgleich am Parkplatz droffa, dann gmiadlich zur Hüttn aufe. Grod dass ma vo da Gratzbürschtign no a Suppn und a Weißbier griagd ham, wos hamsn do fia oane daherzong. Mit Melli und Friends no bei a boa Flaschn Wein aufm Zimmer den Abend ausklingen lassen. Für ihre drei Freindinnen is des ned so guad ausganga - de san iwie Richtung Golm falsch abgebogen und ham vo da Bergrettung ghoid wern miassn.

Drei Türm

1450hm
4h
Über Nacht nomoi einiges an Neuschnee kema, ab da Hüttn ein Buivertraum, nur Namedog beim zruckfahn unten bissl feicht worn.
Anders als vorhergsogt, ein Traum sonniges Tagerl
Endlich warma alle om auf de Türm! Da Sebi (Arbeitskollege vom Leo) war a no mit am Spezl bis zum Sattel dabei, de san dann weida zur Totalphütte ganga. An mittleren Turm hamma no schnoi aufe gspurt, dann weida zum Großn. Abfahrt war ein Traum, so dass ma den Hang bis zum Sporaturm nomoi ganga san. Ingesamt a Traum Tagerl - gschmeidiger Abschluss in der Sauna mit Vino!

Drusentor

600hm
1h 30min
Relativ nass und schwer wegen warmer Nacht, ab 2000m aber wieder feiner Buiver.
Schneefall und bewölkt
Wegen schlechtem Weda und schlechter Sicht gegen die Sulzfluh entschieden. Aufstieg Richtung Drusentor, dann aber kurz davor den schena Hang rechts davo a Stickerl aufe und subba Abfahrt genossen. Unten an da Hüttn schnoi as Zeig ghoid und dann glei auße gschossn, is ziemlich guad ganga bis quasi ganz obe. Wieder moi a geiler Aufenthalt.

Eppzirler Scharte

15 FEB 2025

Scharnitz - Karwendel
Laura, Leo, Samy
1150hm
3h 45min
10-30cm feinster Buiver, quasi ned verfrachtet.
9h Sonne.
Endlich wieder frischer Buiver! Mim Roomsty nach Grießenbach gschossn, traumhafter Kühlschrank des Tal da hinter. Scho a weng a Streckn mit knapp 7km. Beim Aufstieg no an Heinz Zak droffa. Dann hamma uns ab da Eppzirler Alm für d Eppzirler Scharte entschieden, dann aber kurz vorm Ende doch no oans links davo aufe ganga, weil unverspurt. De letzten Meter z Fuaß rauf und oben Sonne und traumhafte Weitblicke isn Sellrain genossen. Abfahrt war steil aber geil, unglaublicher Buiver, teilweise scho a weng zerfahn weil doch einige unterwegs warn. Alternativen gibts no an Haufen: no oans weida links vo unserer Scharte, Kuhloch und rechts davo sans a gfahn. Insgesamt a Traumtagerl!

Goinger Scharte

08 FEB 2025

Griesener Alm - Kaisergebirge
Laura, Mama, Paps, Samy
1200hm
3h 10min
Nordseitig no gnua, im Woid hamma moi drong miassn.
Sonne pur.
Da Hackl Helle hod gsogt im Koasa dads no geh hinten drin, aiso mit de Alten an da Griesner Oim droffa nach relativ langer Anfahrt über A8 und Kössen. Nur im Woid a weng gring, sonst brauchbarer aber ned bsonders guada Schnee. Cooler Aufstieg und einige Tourenmöglichkeiten da im Griesner Kar. Tolle Tour und schena Ausblick - abgerundet mit Tee und Kuacha am Auto!

Portlahorn

02 FEB 2025

Damüls - Bregenzerwaldgebirge
Kiki, Samy
400hm
1h 15min
Schattseitig a bissl buivrig, sonnseitig sche aufgfirnt.
Über dem Nebel da Kaiser.
Auf Mittag den Stau vermeident nach Damüls eine gfahn. Nach guade Pommes um 2 umaranand gmiadlich losganga vo da Straß weg. Ned vui Leid unterwegs und immer no echt guad zum obfahn - wunderbar!

Juppenspitze

01 FEB 2025

Schröcken - Lechquellengebirge
Samy
1200hm
3h 35min
Schattseitig entweder buivrig oder windpresst, sonnseitig teilweise schwa.
Unten Nebel, oben Sonne, ganz bissl zuazong.
Stau in Bregenzerwald vermieden, indem ma erst um 9:00 los gfahn san vo Dornbirn - einwandfrei. Zeit hod guad glangt für de doch relativ lange Tour. Gipfelgrat war tatsächlich spannend und a weng zum higlanga. Aussicht am Greiz war aber a Traum mit dem Nebel unten. Zruck hod ma ab Auenfeldjet nomoi 20min auffellen miassn, so dass ma zur Skiroute nach Schröcken umgekimd (sicher gmiadlicher als zach lang schiam). Insgesamt a sau schene Tour, aber "mittelschwer" wie auf da Bregenzwald Homepage dad i song is nur mit perfekten Bedingungen :D

Wannig

25 JAN 2025

Biberwier - Mieminger Berge
Samy
900hm
2h 15min
Ois dabei außer Buiver.
Anfangs bewölkt, dann immer freindlicher.
Auf da Suche nach machbaren Skitouren bei wenig Schnee wieder moi in Biberwier gland. Mim Auto hi 2h, zruck dafür nur 1,5. Skitourenticket immer no 18€, spoart hoid 600hm Piste. Schnee war wirklich mau, ab da wos richtig steil werd hod ma sogar z'Fuaß geh miassn (ca 200hm). Aussicht war dafür subba und gmacht hodma a wos schens.

Mangfall-Ski-Safari

18 JAN 2025

Lenggries - Mangfallgebirge
Leo, Samy, Striez
1400hm
5h 30min
Süd- und westseitig nix, nord- und ostseitig guad.
Traumsonne.
Mia san auf SKI-SAFARI durchs Mangfallgebirge. Insgesamt 5h 30min ganga, 7h 30min unterwegs gwen. 3h 15min zum Seekarkreuz mit ganz schena Abfahrt zu de Rauhalmen, 50min zum Schönberg übers Maria Eck mit absolutem Kackaufstieg über zertrampelten Scheißschnee dafür mega geiler und steiler Buiverhang, dann 30min zur Hochplatte und steile Abfahrt zum Forstweg (vorsicht ned zu weit), dann 40min zum Parkplatz Klamm.

Ponten

12 JAN 2025

Schattwald - Allgäuer Alpen
Laura, Samy
950hm
1h 45min Sattel, 15 Gipfelzustieg zu Fuß
20cm Buiverauflag auf Harschdeckl, in Schattwald richtig vui weil ned verblosn, whrs grod oans der besten Gebiete von Minga aus vom Schnee her.
Guad ogsogt, mittelprächtig gwen mit Woikn, dafür koa Wind.
Erste Tour mit de neia black crows ski :) so lang wie ma zum Sattel geht, faht ma a mim Auto hi. Aber wars trotzdem wert, a schene Tour und de Ski fetzn wie d Sau. Unten no an ganz guadn Apfestrudl gessen gegenüber vo da Tankstoi - schena Ausflug!

Hirschberg

04 JAN 2025

Bizau - Bregenzerwaldgebirge
Mama, Michi, Paps, Samy, Tom, Vanessa
1050hm
2h 15min
Super geiler Buiva, no relativ wenig zerfahn.
Deutlich besser als ogsogt, fast nur sche sonnig.
Tom hod de Tour rausgsuacht, oide Skipiste so quasi aufn Hirschberg. Katastrophale Anfahrt, maximaler Stau in Woid eine, aber dann wars richtig sche. Oben den letzten Hang hamma nomoi mitgnumma (ca 30min) weila so sche war. Traum Hangerl und subba zum fahn, schena Abschluss vo unsam Urlaub!

Hochälpelekopf

03 JAN 2025

Rikatschwende - Bregenzerwaldgebirge
Mama, Paps, Samy
600hm
1h 30min
Endlich frischer Neischnee!
Trocken, bewölkt, ab und zua bissl aufgrissn.
Hod sauba obalassn de Nacht davor, deswegen relativ spät los und nur schnoi aufs Hochälpele aufe. War aber richtig sche und a sau guada Schnee, unten Langwies hod ma sogar no frisch eispurn kinna.

Gerenspitze

02 JAN 2025

Bad Laterns - Laternsertal
Laura, Samy, Sophi, Vanessa
850hm
2h 30min
Nimma allzuguad, ganz im Nordhang no bissl guada Schnee.
Bewölkt und bissl windig.
Mia woidn no wos doa, bevor d Laura hoam faht, deswegen wos nordseitiges, des is no hoibwegs ganga. Sche durch alle Büsch greid, damit ma ned weit auffe dappln miassn, insgesamt hod sis scho glohnt, dass ma no ausse san - aber a bissl a neia Schnee war scho guad.

Lank

31 DEZ 2024

Rikatschwende - Bregenzerwaldgebirge
Stef
510hm
50min
Nordseitg is no guad ganga, wie a Piste hoid.
Überm Nebel sche sonnig.
No schnoi a d Langwies aufe, bevor ma Silvester gfeiert ham.

Chummerhüreli

30 DEZ 2024

Davos Frauenkirch - Albula-Alpen
Laura, Samy, Stef
900hm
2h 10min
Südseitig nimma guad und scho gscheid woach, Ost- und Nordhänge aber no sehr guad.
Nur Sonn, koa Woikn.
Woidns gmiadlich ogeh lassn und nur auf de Stafelalp, dann is ma aber ziemlich guad ganga und mia ham entschieden, dass ma no Richtung Chummerhüreli aufe gehn. An Gipfel hamma dann auslassn, weil sis Skifahrerisch ned glohnt hod, auf dem Vorgipfe auf 2400m war dann Brotzeit und HAPPY B-DAY SOFIA. Stef und Samy san den Hang Richtung Schwarzhorn no 400hm aufe, dawei ham Laura und i a Rivella auf da sehr voia Hüttn drunga.

Mäschenboda

29 DEZ 2024

Davos Monstein - Albula-Alpen
Laura, Samy, Stef
300hm
1h
Immer no subba Buiver, obwohl scho seit Tagen nur Sonne.
Kaiser again.
In da Nacht scho ned guad pennt, relativ zeitig aufgstandn und wieder nach Monstein gfahn. Beim Mäschboda is nimma ganga, i hob umdraht und mi bei da Kirch no a weng in d Sonn gsitzt. De andern san no aufs Büelenhorn aufe.

Älplihorn

28 DEZ 2024

Davos Monstein - Albula-Alpen
Laura, Samy, Stef
1420hm
4h 35min
Bissl weniger Schnee als in Vorarlberg, aber nordseitig a guade Buiver, oben ham de Stoana aber mies ausagschaut.
Sonne pur.
Erste Tour in da Davoser Gegend, richtig sche da vo Monstein aus zum starten. Woidn eigentlich aufs Chrachenhorn, beim aufegeh aber de Abzweigung verpasst und dann samma einfach aus Älplihorn aufe. Traumhafte Landschaft, geiler Ausblick vom relativ enga und steilen Gipfe - a Traum Tour!

Toblermannskopf

26 DEZ 2024

Schoppernau - Lechquellengebirge
Samy, Stef
2300hm
6h
An haufen frischer Neischnee.
Kaiserweda.
Am Anfang a super Skitour mit absolut geilem Powder. Sogar rüber ganga bis zur Scharte vom Toblermannkopf (1000hm, 2h 45min), dann no nordseitig abgfahn ca. 300hm (50min) mit traumhaften Buiver und wieder aufgsting bis zum Gipfe. Dann runter zum Parkplatz über unglaublich geile Hänge, nur um dann festzustellen, dass ma an Autoschlüssel verloren ham. Ois nomoi rauf bis zum Hochalpekopf (1000hm, 2h 25min), in da Dämmerung mit 1 Stirnlampn vom Stef no gsuacht und nix gfundn. Dann im Dunkel abgfahn, eh relativ guad ganga. Zwoa Dog späda hod dann Petra aus Wolfurt unsan Zedl glesen, an Schlüssel wirklich oben aufm Hochalpekopf gfund und ogruafa - Happy End!

Roßkopf

15 DEZ 2024

Spitzingsee - Mangfallgebirge
Laura, Samy
575hm
1h 35min
Geringe Schneelage, aber dafür relativ vui do, sogar a bissl pulvrig, insgesamt besser als erwartet.
Bewölkt, a weng gschneiblt hods und windig wars.
15€ meng de für den Parkplatz am Suttenlift, dene brennt doch da Huat! 100m weida unten immerhin "nur" 10€. Aufstieg an da Albert-Link-Hüttn vorbei aufn Roßkopf. Abfahrt übers Skigebiet - ziemlich guad ganga. Hauptsach a bissl wos gmacht, bevors auf Nacht guade Rouladen mit Spätzle und Blaukraut gem hod!

Brauneck

24 NOV 2024

Lenggries - Bayerische Voralpen
Laura, Samy
850hm
1h 40min
grod gnuag übrig vom ersten Schneefall der Saison am Freitag, sodass ma vo unten bis fast ganz om geh hod kinna. Abfahrt besser als erwartet.
Nach Kälteperiode wieder guad warm gwen, über 10°, leicht diesig.
Erste Skitour in da neia Saison 2025 und des scho im November. Vui besser ganga als erwartet, schena Dog und Abfahrt hod Spaß gmacht. Weniger zuaganga als ma denkt ham, parken war no gratis.