Skitouren von Mittamore
Saison 2023/24
- 20.01.2024 Hohe Roßfelder
- 21.01.2024 Streicher und Rauschberg
- 27.01.2024 Testa Grisa
- 28.01.2024 Aiguille des Angroniettes
- 04.02.2024 Wannig
- 18.02.2024 Grünsteinumfahrung
- 02.03.2024 Schneeglocke
- 09.03.2024 Sioni
- 10.-11.03.2024 Kazbeg
- 13.03.2024 Bidara
- 22.-24.03.2024 Lindauer Hütte
- 29.-31.03.2024 Schwarzwasserhütte
- 21.04.2024 Blankenstein Reim
- 26.-27.04.2024 Großvenediger
Anzahl Skitouren gesamt: 20
Summe aller Höhenmeter: 21.110
Mittlere hm pro Tour: 1.056
Hohe Roßfelder
20 Jan 2024
Hinterbrand - Berchtesgadener Alpen
1050hm
2h 50min
10-20cm Neuschneeauflage auf grod gnua feste Grundlage.
Sonnenschein pur, koa Woikn zum seng.
Erste Skitour 2024 direkt nachdem ma vo Afrika zruck san, krasses Kontrastprogramm. Aber absolut guada Einstieg in de Skitourensaison für uns, guader Schnee, guade Tour, guade Begleitung, wos mog ma mehr!
Streicher und Rauschberg
21 Jan 2024
1010hm
2h 48min
Ähnliche Situation wie in Berchtsgon, 10-15cm Auflag auf teilweise a bissl zwenig Unterlag.
Sonn, späda is leicht driab worn.
Direkt am nächsten Dog de zwoate Tour hinterher, diesmoi übern Schleicher (super gloane Abfahrt bis zur Strass) aufn Rauschberg (nomoi 200hm, 48min) und über d Roßgassn obe. Roßgassn war oben a Traum zum fahn, unten auße wars scho a weng stoanig, aber ois ohne größere Kratzer ganga. Geile Abfahrtsvariante!
Testa Grisa
27 Jan 2024
Bourg-Saint-Bernard - Walliser Alpen
1150hm
3h 55min
Ois relativ hart (unten hods drauf grengd), teilweise aufgfirnt beim obefahn.
Kaiserweda.
Wunderschene Skitour am St. Bernard Pass, fast ois mit Harscheisen ganga weil ois sehr gfrorn war. Oben no am Hannibal Pass vorbeikema, do sans anscheinend mit de Elefanten drüber. Abfahrt war besser als erwartet, weils unten wo d Sonn am längsten einegscheint hod, doch sche aufgfirnt hod.
Aiguille des Angroniettes
28 Jan 2024
1250hm
4h 50min
Ziemlich ähnlich wie am Vortag, hart gfrorner Schnee, aber Abfahrt doch meist besser als erwartet.
Sonne pur.
Fast no schena des Tal bei La Fouly, wenig Leid de bis ganz hintre gehn, is mit 20km hin und retour doch a weng a Hatscher. Aber oben grandiose Aussicht auf Grand Jorasse und Mont Blanc. Da kema wieder her!
Wannig
04 Feb 2024
1400hm
3h 30min
Bissl a Auflag, oben in de Nordrinnen sogar guadn Buiver. Südseitig hätts a aufgfirnt.
Bissl bewölkt aber mehr Sonn als ogsogt.
Mim Lift zur Marienbergalm, ab do nach rechts weg zum Wannig. Zuerst geplant vormittag aufn Wannig powdern, namedog Handschuhspitze südseitig Firnabfahrt. Nachdem de 2. Rinne rechts vom Aufstieg so guad ganga is, hamma entschieden de 2. links vom Aufsteig a no mitzumnehma (500hm, 1h 15min; zwoa Regnsburger san do oba). Handschuhspitze hamma a a Spur gseng, aber eher Ostseite und gar ned aufgfirnt. Weißbier in da Sunnalm war a Traum Abschluss.
Grünsteinumfahrung
18 Feb 2024
950hm
Hölltörl 42min - Grünsteinscharte 58min - Tajatörl 12min - Ehrwaldalm 24min
Erste Abfahrt no sche aufgfirnt, danach bicke hart.
Super sonnig, fian Schnee in da Sonn aber zwarm.
Oanzige Tour, wo ma ned in Hauptkamm fahn hod miassn. Guad ganga mim Zug wieder.
Schneeglocke
02 Mar 2024
1250hm
4h 25min
Es war no wos übrig vom letzten Schneefall, aber vo Buiver bis Windpresst war ois dabei.
Erst neblig, oben wunderbar Sonne.
Ned wirklich gwusst wos ma macha soin am Wochenende, alle Hütten ausgbucht oder zu Lawinengefährdet. Dann entschieden im Kressi zum pennen und auf d Bielerhöhe zum fahn - super Entscheidung! Traumhafte lange Tour (fast 20km) auf de Schneeglocke. Oben no durch steilen (48°) aber guadn Schnee z Fuaß ohne Steigeisen zum Gipfel stapfen.
Sioni
09 Mar 2024
Sioni - Munizipalität Qasbegi - Georgien
1050hm
3h
Sonne pur.
Erst neblig, oben wunderbar Sonne.
Erste Skitour in Georgien, ein absoluter Traum. Super Tour, obwohl ma am Anfang a weng eine hatschn muas. Da Joni, a Straßenhund, hod uns begleitet und is aufe wie obe grennd. Top Ausblick aufn Kazbeg, da hamma scho gmerkt, dass evtl schwa wern kannt weils brutal eisig ausgschaut hod.
Kazbeg
10 Mar - 11 Mar 2024
Stepanzminda - Munizipalität Qasbegi - Georgien
Zustieg Betlemi Hut
1600hm
5h 15min
Kurz hinter da Kirch is mit Ski ganga, unten no guada Buiver sogar, oben immer weniger dafür mehr windpresst.
Anfangs sonnig, oben a weng de Wolken drin, hod aber späda aufklart.
Langer Zustieg, der zum Glück abgekürzt werden hod kinna, weil ma mim Auto (fast) bis zur Kirch fahn hod kinna. Vorbei an extrem kläffende Hund und der Spur vo 4 Schweizer Mädels folgend über de Altihut zur Betlemi Hut. Gletscher seilfrei, koa Problem. Aufm Weg an Archill droffa (erster Georgier aufm Nanga Parbat), der uns sogar mit in den Bergführerraum mit Ofa gnumma hod. Deutlich bessere Nacht ghabt als erwartet, obwohl de Spaghetti a reiner Baaz warn. Da warme Schlafsack hod si trotzdem rentiert!
Spartacus
1100hm
4h 30min
Ab da Hüttn wenig Schnee und vui Stoana. Danach entweder windpresst oder Blankeis.
Sonnentag nummero 3!
Da uns alle abgeraten ham und gsogt ham, dass de Bedinungen schlecht san hamma an Kazbeg Gipfel nimma fokusiert. Um 8:15 samma dann relativ guad ausgschlaffa trotzdem Richtung Plateau gestartet. Bedinungen warn bis aufn wenigen Schnee aber guad und mia san ohne Probleme zum 100hm höher gelegenen Spartacus auf 4500m kema, wenn a mit größter Müh (zumindest bei mir :D). Da Kazbeg selber hod a relativ große Spaltn ghabt und oben greisligs Blankeis. Mit 1 Fuß in Russland hod ma da oben an unglaublich geilen Ausblick! Insgesamt a wahnsinns Tour!
Bidara
13 Mar 2024
Gudauri - Munizipalität Qasbegi - Georgien
600hm
1h 20min
Super geiler Buiva no, aber relativ zerfahn.
Deutlich besser als ogsogt, aber man hod scho gmerkt, dass boid schlecht werd.
Letzte Skitour in Georgien für dieses Mal. Nach Schnapsabend mit Schweizer Mädels doch erst Mittag aufkema und recht spät gestartet, aber top Auskatertour auf die Südseite vom Mount Bidara, auch Pentagon Abfahrt genannt. No a boa super Lines gfundn, a Traum Abschluss und unten in Gudauri hods dann endlich Burger gem!
Lindauer Hütte
22 Mar - 24 Mar 2024
Dani, Korbi, Laura, Leo, Samy, Sofia, Striez
Zustieg
750hm
1h 50min
Mit Ski sinnvoll kurz vorm Wald, oben sau vui
Nachtzustieg, koa Niederschlag und heller Mond
Dieses Moi alle dabei, gleichzeitige Abfahrt in Minga, sodass ma gemeinsam zuasteing kinnan. Zustieg in da Nacht, Parkplatz in Latschau heia gratis! Pizza bei da Anreise hod ghoidn, Suppn häds aber no gem um 21:30.
Sporaturm + Öfasattel
1050hm
3h 30min
Unten hart, zwischendruch harschig, kurz vorm Sporaturm richtig geiler Buiver. Vom Öfasattel runter dann scho woacha.
Sonnig bis zur Kaltfront ab ca. 9:30, danach Schnee und Nebel.
Weda sogt a Kaltfront zwischen 9-10Uhr, aiso Wecker auf 4:00 und los gehts um 4:30. Sonnenaufgang im Tiergarten, Gipfelschnaps um 7:30 kurz hintam Sporaturm weil zu vui Schnee drin. Schneeprofil bei ca. 38° grom, hod a relativ guad ghoidn (erst ausgelöst als da Leo drauf gsprunga is), aber wegam Weda dann doch umdraht. Super Abfahrt de ersten boa hundert Höhenmeter, dann harschig. No kurz aufe zum Öfakopf (300hm, 40min), um 9:30 hods dann aber gewaltig schnoi zuazong, desweng schnoi zruck zur Hüttn, nomoi schlaffa, Sauna und Essen! Geiler dog!
Drusentor
500hm
1h 30min
30-50cm Neuschnee, brutal geiler Buiver.
Schneefall
Entschieden no wos kurzes zum macha, Aufsteig Richtung Drusentor, Abbruch kurz unter Steilstück. Gseng hod ma ned vui, da Schnee war aber geil. Korbi Sofia Dani und Striez san bissl eher los, Rest is den Hang bei da Hüttn nomoi aufe. Runter hod ma bis kurz vorn Gasthof fahn kinna, des war geil!
Schwarzwasserhütte
29 Mar - 31 Mar 2024
Laura, Lina, Abi, Samy, Stef, Vanessa
Zustieg und Steinmandl
800hm
2h 40min
Nos und schwa, oben immer suiziger werdend, zum Teil hods sogar as Wasser an da Seitn ausadruckt.
Erst sche sonnig und brutal warm, dann immer mehr diesig und zuazong (Saharastaub).
Mittag rum los kema mit Laura und Samy vom Parkplatz Ifen. Vui Leid unterwegs, vor allem a Fußgänger. An da Hüttn schnoi Zeig obglegt und dann no kurz aufs Steinmandl aufe (400hm, 50min). Schaut steiler und länger aus wias is. Oben hod ein unglaublicher Fönsturm blosn, das ma si sogar am Greiz festhoidn hod miassn. Vanessa hod Felle dahoam vagessen, dadurch leichter Verzögerung, aber alle pünktlich zum guadn Abendessen gschafft (Kaasspozzn).
Rundtour Hählekopf und Steinmandl
1050hm
3h
In da Friah no einigermaßen hart, aber gegen Mittag immer mehr suizig.
Saharastaub diesig.
Vom Hüttenwirt den Tipp griagd, dass Richtung Hählekopf und hinten runter Richtung Ifersguntalpe no am besten geh werd, trotz scheiß Schnee. Und es war tatsächlich lässig, aufm Weg zruck nomoi as Steinmandl mitgnumma. Heid war da Wind a bissl weniger, aber ähnlich böig. Super Gulasch auf da Hüttn griagd!
Hählekopf und Abfahrt über Ifersguntalpe
750hm
2h
In da Friah hart, späda woach.
Weniger Saharastaub, späda sogar kurz sche sonnig.
Über Nacht wieder einiges abgstrahlt und sogar an Hauch drauf gschnim, dadurch Abfahrt vom Hählekopf erstaunlich guad! Unten auße weniger und bazigerer Schnee, aber nach kurzer Tragepassage im Wald guad bis zum Parkplatz durchkema. Kurzes Eisbad im Stausee vor da Piste a no mitgnumma. Insgesamt a lässigs Osterwochenende mit na subba Gruppn!
Blankenstein Reim
21 Apr 2024
Rottach-Egern - Mangfallgebirge
800hm
2h 20min
Vom Parkplatz weg Schnee, oben 1m Neuschnee ohne Unterlag
Schnee ogsogt, aber eig ganz guad, am Anfang sogar sonnig, dann bewölkt
Spontan nach dem Wintereinbruch los zum Blankenstein, moi schaun wos geht: und es war da Hammer. Bis zum Hütterl gspurt, extrem anstregend, dann vo de oanzigen 2 andern abgelöst worn. Super Tour, geil den Buiver Ende April ausgnutzt!
Großvenediger
26 Apr - 27 Apr 2024
Neukirchen am Großvenediger, Hohen Tauern
Zustieg
1600hm
4h 10min
Kurz hinter Postalm mit de Ski, oben maßig, no ned z woach, wie im Winter.
Super sunshine, unten kurze Hose Tshirt.
Eigentlich war Haute Route geplant, aber da in de Westalpen sau schlechts Weda war, samma an Venediger ausgwicha. Spontan no 5 Plätze auf da Kürsinger Hüttn griagd, a Traum. Hüttentaxi vom Hopffeldboden war scho relativ voi, de Mädels und unser Gepäck hod aber no Bloz ghabt. Bis zur Postalm in 1h 15min grennt, dann gmiadlich zur Hüttn. Super Essen obwohl mit Sauerkraut, aber erst moi 15 Getränke bstoid :D Absolut geiles großes Zimmer 1 ghabt, coole Hüttn insgesamt.
Großvenediger
1400hm
3h 50min
A weng gfrorn, a weng windpresst, mittendrin a Traum Buiver und a weng woach ganz unten.
Super Sonn, nur oben sau bläd in de Woign gwen
Großvenediger bis jetzt nur vom Defreggerhaus vo da andern Seitn im Sommer gseng, erste Skitour aufe. Gmiadlich nach alle andern um hoibe 8e los ganga, nach knappe 4h aufm Gipfe gwen. Gseng hamma ned vui, aber a Schau wars drozdem! Wahnsinns Powder Turns direkt obe bis fast zur Postoim. "Gmiadlich" ausklingen lassen im Lichtl in Kitz.
