Skitouren von Mittamore

Saison 2022/23

Mont Blanc du Tacul

07-09 APR 2023

Chamonix-Mont-Blanc
Laura, Leo, Lina, Samy, Stef

Tag 1: Refuge du Requin

820hm
4h 15min
A bissl Neischnee, mit Ski vom Mer de Glace
Am Anfang no a weng sonnig, dann hods gschneiblt und zuazong
Mit da Zahnradbahn vo Chamonix nach Montenvers (37€ Hin und Retour), dann kurzes Stickerl mit da Gondel, Rest z Fuaß bis zur Eishöhle. Ab do mit de Ski as Mer de Glace rauf zur Requin Hüttn (teilweise am Seil). Aufm Weg einzelne Skifahrer droffa, des muas aber no ned bsonders guad gwen sei zum Abfahn bei Nebel und Schnee. Requin is a nette gloane Hüttn, Essen war guad aber mitm Löffel derf ma ned aus da Schüssel essen!

Tag 2: Refuge du Cosmique

1040hm
4h 50min
Über Nacht einiges an Neischnee obaghaut
Bomben Weda
In da Friah mit blauem Himmel und bestem Blick auf Dent du Geant gstartet. Teilweise den ersten Teil no a weng spuren miassn, dann san immer mehr Skifahrer vom Vallee Blanche entgegen kema. Traum Kullisse, vui Leid a zu umliegende Gipfel unterwegs. 2 ganz Wuide san as Jager Couloir (55°) gfahn, Steilwand Richtung Tacul rauf. Kurz vor da Hütte ham Leo und Stef mit 4 Italiener no de Route aufn Tacul gescouted. Koa Spur dafür an haufn Schnee drin. Bis circa zur Hälfte hods aber mit massig Spurkraft guad klappt. Entscheidung: wir probierns morgen.

Tag 3: Mont Blanc du Tacul

650hm
3h 30min
Ordentlich Neischnee drin im Hang
Kaiserweda
Um 5:00 Uhr aufgstandn und dann rechts rum rauf zum Tacul. Letztes Jahr san de Leid eher links rum ganga, aber rechts rum hod ma guad durch de Seracs gfundn. 1 Stoi wos a bisserl steiler war (mit Steigeisen und Pickel ganga), sonst guad mit Ski (bzw Ski am Rucksack) gehbar. Den ganz letzten Gipfel hamma aus Zeitgründen auslassn, des Tacul Plateau war unser Ziel. Aufm Weg runter fast Ski weggwen bei Abfahrt durch den Steilhang (zum Glück Samys Hand nur so gestreift, dass er oamoi umdraht hod und nix schlimmeres basiert is). Abfahrt durchs Vallee Blanche war wundersche, sau lang (insgesamt 2400hm), extrem zerfahn aber unten hamma easy de Bahn zruck dawischt (mit ca 200 andere Leid). Überschreitung aufn Mont Blanc wär whrs a Nummer zu krass gwesen, aber der Tacul war a extrem lohnende und schene Saisonabschlusstour!

Point 815

01 APR 2023

Fagernes - Tromsø (Norwegen)
Korbi, Leo, Striez
800hm
1h 15min
Unten brutaler Buiva, oben windpresst
Wieder sche aber a weng bewölklt
Da immer no alle Straßen gesperrt warn, samma über Finnland und Schweden zruck nach Tromsø gfahn. Weil ma sau guad durchkema san, hamma uns no a Abschlusstour kurz vor Tromsø gönnen kinna. 800hm aufegast und unten wunderschene Powderturns durchn enga Birkenwoid, a Traum! Nächst Jahr wieder!

Veienfjellet

31 MAR 2023

Alta - Vest-Finnmark (Norwegen)
Korbi, Leo, Striez
150hm
1h 50min
Frischer, bissl feichter Neischnee
Schneefall
Irgendwos muas ma ja macha, wenn ma eigschneibt is. Abwarten und 360 lernen am "Straßenberg" aka Veienfjellet.

Tafeltinden

28 MAR 2023

Koppangen - Lyngen (Norwegen)
Korbi, Leo, Striez
1400hm
3h 30min
Scho wieder unglaubicher Buiva, quasi Japow!
Sonne pur - again.
In Outdooractive als "Gletscherhatscher" beschrieben, aber in echt a wunderschene, doch lange Tour. Anseilen hod ma ned braucht, oben kurz vergangen, dann doch richtig nach rechts rum abgebogen. Am Gipfel a Gruppe Österreicher und Italiener droffa, de ham den Steilhang für uns vorgfahn. Leo und ich san dann obe, a wahnsinns Hang, hinten durch a gloans Joch durch und nomoi oans weida. Unvergessliche Hänge!

Husfjellet

27 MAR 2023

Senja - Troms (Norwegen)
Korbi, Leo, Striez
630hm
1h 25min
Unten a weng woacha, oben no super Buiva.
Fast kitschiger Sonnenuntergang am Gipfel, koa Woikn in Sicht.
Wir gehn zum HAUSFILET!! Tag 2, Skitour 2. Striez woid nomoi richtig Gas gem und is direkt zu na foischn Schartn vorgesprintet :D unglaublicher Ausblick am Gipfel mit super Sonnenuntergang. Abschluss Bierle am Hafen unten, a absoluter Traumdog.

Store Hesten

27 MAR 2023

Senja - Troms (Norwegen)
Korbi, Leo, Striez
870hm
2h 10min
Aufstieg ganz guad, Abfahrt allererste Sahne, Surfpowder pur!
Kaiserdog Nummero due.
Tag 2, Skitour 1. Spontan hinten nach SW runter gfahn, so an brutalen Buiva koma si ned entgeh lassen! Weg zruck koa Problem, kurze Schiebepassage übern See zruck (bis auf Striez alle angefellt). "Woa leck jetzt koni versteh, dass Skifahn a Spaß macha konn" - Striez.

Kvænan

26 MAR 2023

Senja - Troms (Norwegen)
Korbi, Leo, Striez
1000hm
1h 50min
Unten a brutaler Buiva, oben stark windpresst.
Nur Sonne.
Erste Skitour in Norwegen, a unglaubliche Kulisse! Unten de Fjorde, oben de wuid verschneiten Zacken. Oben a boa Schweden droffa, de a steile Variante abgfahn san, mia san den Aufstiegsweg wieder obe. Übernachtung in am lässigen Haus a Stickerl über Finnsnes.

Grünstein Umfahrung

18 MAR 2023

Ehrwald - Mieminger Berge
Leo
1020hm
Hölltörl 40min - Grünsteinscharte 50min - Tajatörl 15min - Ehrwaldalm 20min
Am Anfang a weng harschig, Grünsteinscharte no Buiver, suizig unten raus.
Sonne pur.
Subba Dog, sauber Gas gem beim Aufstieg, Schlepplift no mitgnumma beim aufefahn (wos sehr sinnvoll is). An haufa Leid unterwegs, weils do no ganz guad ganga is. Anreise mim Zug über Garmisch und Ehrwald, dann Bus hod subba funktioniert.

Blankenstein Sattel

11 MAR 2023

Rottach-Egern - Mangfallgebirge
Laura, Samy, Sophia
750hm
2h 20min
10-15cm frischer, bissl feichter Neischnee über Nacht.
Bewölkt aber guade Sicht, ab und zua leicht gschneiblt, insgesamt ganz guad und besser als ogsogt.
Als Ausweichtour geplant war des insgesamt a super Unternehmung: wenig los, ganz guader Schnee und ned im Nebel. Erst moi rechts rum übern Röthensteingraben ganga. Für d Abfahrt oben links ghoidn, dann relativ guad ume queren kinna. Erste Skitour für Sophia dieses Jahr.

Lindauer Hütte

03 - 05 MAR 2023

Latschau - Montafon

Zustieg

Laura, Stef
750hm
1h 45min
Mit Ski sinnvoll ab Forststraß, dann gnua
Nachtzustieg, koa Niederschlag und heller Mond
Zustieg in da Nacht, Parkplatz in Latschau heia 4€/dog. Hod no a suppn gem um 22:00 Uhr. Leider warma am Ende nur 3 statt 9 Leid, wegen Krankheit, Verletzung, Urlaub und Babysittermangel.

Drei Türm

Laura, Stef
1100hm
2h 45min
Meistens Buiva, ab und zua windpresst, südseitig sehr wenig, nordseitig subba.
Traumweda, sehr sonnig
Dieses moi außenrum durchn Tiergarten aufgsting, deitlich gmiadlicher. Mittleren Turm a no mitgnumma. Abfahrt oben a weng windpresst, nach steiler Querung richtig guad und teilweise unverspurter Nordseitenpulver. Leider is ma da Fersenautomat vo da rechten Bindung brocha nach am gloana undramatischen Purzelbaum. Nach 15min Graben hodn da Stef wieder gfundn, mit Kabelbinder vo am Andern fixiert und guad abfahn kinna.

Sulzfluh

Laura, Stef
1150hm
2h 45min
Sehr zerfahn, ab und zua no Buiva, bis zum Ende vo da Forstraß guad zum abfahn.
Traumweda, wieder sehr sonnig
Mit kaputter Bindung trotzdem durchn Rachn aufgsting, ned so dramatisch wie da Name vermuten lasst. Unten kurze Tragepassage durch steiles Latschengelände. Durchgehend angenehm steiler Anstieg, des Gipfegreiz is scho vo da Sulzfluh, deischt a weng und is weida wies ausschaut :D Kabelbinder ham ghoidn, da ma unser Zeig unten lassen ham, koa Rundtour sondern zruck wie Aufstieg. Geile Abfahrt nomoi und richtig schene Tour!

Blankenstein Reim

02 MAR 2023

Rottach-Egern - Mangfallgebirge
aloa
880hm
Riedereck 1h 5min - Blankensteinsattel 20min - Röthenstein 10min
no guad vui übrig vom Schneefall vom Sonntag, teils harschig, teils schwa, aber oft no buivrig
Sche sonnig nur leicht bewölkt
Erste Skitour aloa, vormittags vor da Abat, um kurz nach 12e wieder in GH gwen. Richtig schene Abfahrt mit geilem Buiva durchn Obstgarten, an da Alm vorbei durchn Woid abgfahn, dann kimd ma unten bei da Forstrass kurz vor da Bruckn aussa (muas aber kurz über a Bachal drong). Zwoa Leid han de Blankenstein Nordwand aufebicket - wuid.

Wösterhorn

12 FEB 2023

Lech - Lechtaler Alpen
Samy
900hm
2h 20min
A weng a Neischnee, aber brutal warm und unten scho schwa und bazig zum ausse fahn.
Wunderschena sonniger Dog
Nachdem ma am Dog davor mit Francis und Sophi Skifahn warn, woid ma no wos macha bevor ma wegfahn aus Lech. Aufstieg wie gewohnt, aber plötzlich vo na Pistn überrascht worn, de bei da Alp entlang vorbeiführt. Ned weida dragisch, beim restlichen Aufstieg warma aloa, Abfahrt oben herrlich, untn schwa und hoass aber insgesamt lohnende Tour. Danach hods leider den ganzn schena Schnee wieder weggschmoizn.

Dürrnbachhorn

05 FEB 2023

Reit im Winkel - Chiemgauer Alpen
Lina, Mama, Paps, Samy
1000hm
2h 20min
Unten a weng feicht, oben a schene Auflag frischer Graupel.
Bissl bewölkt, immer wieder sche sonnig.
Immer wieder sche aufs Dürrnbachhorn, oans vo de oanzigen grüna im Skitourenguru. Om bis zum Gipfe geh kinna, wunderschene Abfahrt und Race mit Mama ins Tal. Nussschnecken und Tee am Auto wie immer ;)

Flirsch am Arlberg - DAV Kurs

29 JAN - 01 FEB 2023

Flirsch - Lechtaler Alpen
Achim, Frank, Laura, Leo, Robert, Samy
60hm + 80hm
1h
No einiges an Buiver vorhanden, am 3. Dog hods a schene 10-15cm Auflag gschneibt, ein Traum.
De ersten drei Dog super Weda, am letzten Dog brutal stürmisch und Schneefall.
DAV Kurs Skifahren im freien Gelände für Fortgeschrittene in Flirsch am Arlberg, Berghotel Basur. Sauber wos glernt beim Achim Zimmer: Batschn viare, Oberkörper geht nur in da vertikalen, inneren Schweinehund überwinden und ned nach hinten lehna, Verse hoch und Kurvn ausfahn, Schulter locker und Disco. Leider hoda si am Ende vom 2. Dog de Schulter brocha bei da letztn Abfahrt auf da Piste, danach samma no a weng solo unterwegs gwen. Geile Varianten in Zürs: Erzberg Variante mit leichtem Anstieg (manche san a zu Fuß), entlang da Seekopfbahn, Madlochbahn rauf und dann Abfahrt vorne rum Richtung Zug (2 Felsriegel maus ma queren)mit Traum Hängen.

Glatthorn

28 JAN 2023

Faschina - Bregenzerwaldgebirge
Kiki, Lio, Matthias, Samy
750hm
2h
Bissl Buiver war no do, oben a weng abblosn, insgesamt guad
Unten neblig, oben genau überm Wolkenmeer
Matthias mit Lio in da Kraxn bis zum Lift ganga, mit Kiki und Samy weida und dann z Fuaß zum Gipfe gstapft. Oben Sonne über de Wolken genossen, Rückfahrt durch netten Liftler entspannt ohne Gegenanstieg. Schene Tour!

Schwaigberghorn

22 JAN 2023

Kelchsau - Kitzbüheler Alpen
Laura, Samy
1150hm
2h 45min
30-50cm frischer Buiver.
Erst sonnig später zuazong.
Traumtour bei Lawinen 3er mit Neischnee Problem. Nordhang am Gipfel war stark verspurt, deswegn no mitgnumma, richtig geil mit knietiefm Powder. Da Lodron gegenüber warad a a guade Alternative gwen bei dene Verhältnisse.

Naturfreundehaus Kolm-Saigurn

13-15 JAN 2023

Raurisertal - Goldberggruppe

Tag 1: Zustieg

Korbi, Laura, Samy, Striez
400hm
1h 40min
Neuschnee.
Schneefall.
Hüttenzustieg mit Samy auf da Forststraß im Dunkeln. Auto zwei is guade zwoa Stund späda okema, dafür hods dann no Rotwein in unsam privaten Lager gem.

Tag 2: Richtung Hoher Sonnblick

Korbi, Laura, Samy, Striez
1000hm
3h 15min
Vui frischer Buiver, aber oben sehr stark verblosn.
Sonne und starker Wind.
Da er letzts Jahr ned ganga is, woid ma heia aufn Hohen Sonnblick. Schneefall vo da Nacht davor hod a guad gnuage Unterlag fürn Aufstieg brocht, aber da starke Wind oben hod leider ois wieder verblosn. Ab Schutzhaus Neubau einige Lockerschneelawinen zum seng, als dann überhoib vo unserer Aufsteigsspur wos obkema is, samma wieder umdraht. Der eigentlich flache Rückweg war dann dermaßen eigwaht, dass des ned direkt a Spaß war. Wuidere Unternehmung, da ham de Tschechen beim Riffelkamm drüben definitiv mehr Abfahrtserlebnis ghabt.

Tag 3: Kolmkarspitze

Korbi, Laura, Samy, Striez
950hm
3h
Unten woacher Neischnee, oben windpresst und pulvrig.
Bedeckt, deutlich wärmer, am Ende kurz sonnig
Tipp vom dünnen Kellner mit de Sprüche, dass Kolmkarspitze whrs guad geht. Übernachtig, verkatert und mit Wasserblosn aufbrocha und echt no a boa geile Hänge dawischt. Nach Topfenschmarrn gmiadlich über Forststraß abgfahn in unter na hoibn Stund. Immer wieder a Traum!

Brecherspitz

17 DEZ 2022

Neuhaus - Bayerische Voralpen
Laura, Samy, Stef
930hm
2h 30min
Erster gscheider Schnee vo da Saison, wenig Unterlag.
Hochnebel abwechselnd mit Sonn.
Erste Skitour heia, wenig Schnee aber drozdem guad ganga. Eigentlich woid ma aufn Bodenschneid geh, am Bodenschneidhaus, samma dann aber zur Freudenreich-Alm abgfahn, weil zwenig Schnee war. Brecherspitz is dann aber subba ganga.